شاهد مقطع فيديو عن قصيدة الحب لهشام الجخ
يعد الشاعر هشام كامل عباس محمود الجخ من الشعراء المصريين المعاصرين، الذي له العديد من القصائد الشعرية، وكلها قصائد شعرية له على شكل إصدار صوتي، حيث يرفض الشاعر هشام الجخ حتي وقت كتابة هذا المقال إصدار ديوان شعري له مطبوع
شعر حب لهشام الجخ
لطناش أربعة : ابراهيم و محمود و فادى و محمد
..
الطناش
ابراهيم
انك تعشقيه جدا
و هو بغشمه ما بيدراش
انك تكتبيله يوماتى حبيتك
و ما بيقراش
و بعد هموم
من الحب اللى مش مفهوم
و بتعافرى
و بتناهدى
و بتجاهدى
و هو طناش
و بعد ما حبك يبتدى يدبل
و احساسك يغيب عنده و يتحول
هتكتشفى انه كان مجنونك الاول
لكنه يا عينى واد أهبل
ولا بيعرف يقول اشعار
ولا بيرسم
ولا بيكراش
فقضى العمر كله طناش
..
الطناش
محمود
انك تعشقيه و يموت
تحسى برغبتك انك تعاتبى عليه
بتوعد ليه ؟
ما دمت ضعيف و ما تقدرش
هييجى العيد و ما هتحضرش
هترجع تانى ماما تقولى ما اتأخرش
و بابا يقولى ما اتهورش
و اصعب على البنات
و يقولوا سلوها علشان تنسى و متفكرش
محدش شايف المشهد .. أنا شايفاه
اخركم مصمصة و تنهيد و يا عينى و يا حول الله
عزاكم كلمتين ماسخين و لبس اسود
و شيخ قاعد بيقرالنا فى سورة الفجر
أنا الفجر
أنا الفجر الوحيد اللى ما هينورش
ما تطولش فى الارباع يا سيدنا الشيخ علشان الناس ما تتأخرش
سامعينك تلاوة حفصة عن عاصم
أنا بس اللى سامعاك ورش
أنا الفجر الوحيد اللى ما هينورش
ناديته بعزم خوف الوحدة
ما اتدورش
و كمل و عاش
و أنا لسه بنادى عليه
و هو طناش
..
الطناش
فادى
انك تعشقيه عمداً
علشان تنسى حبيب غيره
فيقعد يرغى .. مش سامعاه
و يقعد يهرى .. مش حاساه
يجيبلك من الجبل سبعه
و من شجر الجبل طيره
و برضه بتعشقى غيره
و عايشة كل تفاصيله
كان بيسوق بأيد واحدة
كان بيغير و يتخانق على الواحدة
و يستناكى لما يوصلك بالليل ترنيله
و كانت كل اسرارك و اخبارك و همس الليل و ترتيله
يدوبوا فى نظرة من عينه و تسبيله
و فجأة تفوقى و تبصى على بديله
بيهرى
لسه بيهرى و يحكى فى احلامه و ايامه و منامه و اوهامه
و يبدأ يختفى كلامه و يظهر تانى طيف غيره
يبان فى عينيكى تأثيره
بنظره حزينة
شافها التانى مفهمهاش
محدش قاله على القصة و محضرهاش
فتبتسمى
علشان ما يقولكيش مالك
و تقعدى جنبه مش حاساه
كأنه ما جاش
و يجرى الوقت وسطيكم
طناش فى طناش
..
الطناش
محمد
انك تعشقيه اصلاً
لا هو زيك ولا شبهك ولا عيلتك شبه عيلته
ولا قادر يجيبلك شاى
ده هو يا دوب شايل شيلته
و انتى غزالة
عايزة الورد و الحنة و عسل النحل
شفتى غزالة عمرك عايشة وسط الوحل ؟
ده عيل سيح
بيتلون و يتنسون و يتمسكن كما التماسيح
هدومك بيضا مش حمل الوسخ و الهيل
و عيشتك غالية على عيشته
و هو ضعيف و مفيهوش حيل
هيبقى معاكى وقت الرقص
و يسيبك فى وقت الشيل
دلوقتى هيرسملك فى ضحكاته و يتبهرج
لكنه اصله .. أصل اعوج
فى وقت الشدة هيبان لك ولد تانى
بخيل و عويل و متصلب و عايش دنيته انانى
و انتى ورثتى من ابوكى خزاين عز ربانى
فمش لايق على صدر الحراير عقد برانى
ده واد جربوع
خالته و عمته و سته و جوز امه ميتين من الجوع
و انتوا كلابكوا فى العزبة بتاكل بقرة فى الاسبوع
مفيش بين الارانب و السباع أنساب
و لو على الحب .. ياما اتفرقت احباب
هتنسى زى كل الناس ما نسيت بعض
و مش من قلة الأخيار .. ما هى الرجالة مالية الأرض
بس يكون على مقاسك
حاسس نفسك احساسك
و ليه طلة شبه ناسك
بنات العيلة قدامك ما صغروناش
يا بنت الناس ما تفضحيناش
ياما رضينا مع ان الكلام ما رضاش
و عشنا العمر كله طناش
تعليق واحد